Çinin texnologiya nəhəngi “Huawei” şirkəti ABŞ hökumətini məhkəməyə verib.
Guardian yazır ki, buna səbəb ABŞ-ın dövlət idarələrində və bu idarələrlə əməkdaşlıq edən şirkətlərdə “Huawei” məhsullarından istifadəyə qadağa qoymasıdır.
Şirkətin idarə heyətinin sədri Qo Pin ABŞ-ı sərt tənqid edib. O deyib ki, bu cür qadağa tətbiq etməklə irəli getmək mümkün deyil:
Bu qadağa konstitusiyaya ziddir. “Huawei”nin rəqabət gücünü azaltmaq amerikalı istehlakçılara da ziyan vurur. Bəlkə də ABŞ hökuməti “Huawei”yə məhdudiyyət qoymaqla fayda əldə edəcəyini düşünür. Halbuki, ABŞ-ın və digər ölkələrin “Huawei”nin 5G texnologiyasına dəstəyini məhdudlaşdırması onların öz milli maraqlarına da uyğun gəlmir.
Nə baş verib: “Huawei” şirkətinin qurucusunun qız və şirkətin maliyyə direktoru Men Vançjou ötən il ABŞ-ın tələbi ilə Kanadada saxlanılıb. Men və “Huawei” şirkəti ABŞ-ın İrana tətbiq etdiyi sanksiyaları heçə saymaq, rüşvətxorluq və texnologiya oğurluğu da daxil olmaqla 23 maddə ilə ittiham olunur.
Bundan sonra ABŞ təhlükəsizlik səbəbilə “Huawei” məhsullarının federal hökumət təşkilatlarında istifadəsinə qadağa qoyub. Avstraliya və Yeni Zellandiya başda olmaqla daha bir neçə ölkə isə telekommunikasiya şirkətlərinin 5G texnologiyasında “Huawei” avadanlıqlarından istifadəsini qadağan edib.
