Bunu hər əsərə aid etmək mümkün olmasa da bədii əsərlərin bir qismi məhz ilk cümləsinin cəlbediciliyi, yaddaşa həkk olunma gücünə görə daha çox təsir edir, daha çox yadda qalır.
Kult.az bu əsərlərin bir qismini seçib.
Frans Kafka – “Çevrilmə”
Bir səhər gecənin narahat yuxusundan ayılan Qrezor Zamza başa düşdü ki, elə yatağındaca əcaib bir həşərata çevrilib.
C. D. Selincer – “Çovdarlıqda uçurumdan qoruyan”
Əgər, siz, doğrudan da, mənim başıma gələn bu sarsaq əhvalata qulaq asmaq fikrindəsinizsə,onda, yəqin, birinci bunu bilmək istəyəcəksiniz ki, mən harada və haçan anadan olmuşam,uşaqlığım hansı bəd əməllərlə əlamətdar olub, mən doğulanacan valideynlərim nə işin sahibi olublar və sair və ilaxır, qısası Devid Kopperfild sicilləməsi; ancaq, düzünü bilmək istəsəniz,mənim bu cür köhnə palan içi tökməyə heç həvəsim yoxdur. Əvvəla, ona görə ki, belə şit şeylərdən zəhləm gedir.
Lev Tolstoy – “Anna Karenina”
“Bütün xoşbəxt ailələr bir-birinə bənzəyirlər,bədbəxt ailələrin isə hərəsi bir cür bədbəxtdir”.
Çarlz Dikens – “İki şəhərin əhvalatı”
“Həm müdriklik, həm də axmaqlıq zamanı idi. İnanc, eyni zamanda inkar dövrü idi. Bir tərəfdən aydınlanma, digər tərəfdən də zülmət çağı yaşanırdı. Ümidin baharıydı, bədbinliyin qışı. Hər şeyimiz var idi, amma heç bir şeyimiz yox idi. Hər birimiz birbaşa cənnətə gedirdik, amma hamımız eyni zamanda cəhənnəmə də gedirdik.”
F. S. Fitscerald – “Möhtəşəm Qetsbi”
“Toy vaxtı atam bir nəsihət vermişdi, hələ də qulağımda sırğadır: “Nə vaxtsa birini tənqid etməyə çalışsan, unutma ki, hər kəs səninlə eyni şəraitdə doğulmayıb!”
Duqlas Adams – “Avtostopçunun qalaktika cədvəli”
“Qalaktikanın Qərbi Dolanbac Qolunun bir küncündə, hələ xəritəsi belə çəkilməyən ucqar nöqtədə, gözdən uzaq, xırda və sarı bir günəş var. Bu günəşin orbitində, yüz qırx səkkiz milyon kilometrlik nəhəng bir məsafədə, tamamilə lazımsız və mavi-yaşıl rəngli, xırda bir planet fırlanır. Planetin meymun əcdadından törəmiş canlıları o qədər ibtidaidir ki, rəqəmsal qol saatının hələ də möcüzəvi bir şey olduğunu düşünürlər.”
Çak Palanik – “Tıxanma”
“Əgər bunu oxumağı qarşınıza məqsəd qoymusunuzsa, fikrinizdən daşının”.
Orxan Pamuk- “Yeni həyat”
“Bir gün bir kitab oxudum və bütün həyatım dəyişdi”.
Albert Kamyu – “Yad”
“Bu gün anam öldü, ya da dünən, dəqiq yadımda deyil”.
