Şimali Koreyada Ali Xalq Məclisi üçün keçirilən seçkilərin nəticələri açıqlanıb.
Independent yazır ki, yerli media xalqın 99,99 faizinin seçkidə iştirak etdiyini iddia edib.
687 namizəd arasında adı olmayan ölkə lideri Kim Çen In Ali Xalq Məclisinda mandatı olmayan ilk Koreya lideri kimi tarixə düşüb. Kim Çen Inın niyə belə bir addım atdığı bilinmir.
Siyasi analitiklər hesab edir ki, bu, onun özünü icra və qanunverici orqanları ayrı olan demokratik bir dövlətin lideri kimi təqdim etmə cəhdinin bir hissəsidir.
Kim Çen Inın kiçik bacısı Kim Yo Çenin də yeni seçilən məclis üzvləri arasında olduğu bildirilir.
Ali Xalq Məclisi nədir: Şimali Koreyanın qanunverici orqanı olan məclisin bütün üzvləri ildə 1 və ya 2 dəfə, mart və aprel aylarında Kim Çen İnin başçılıq etdiyi hakim partiyanın hazırladığı qanunları təsdiq etmək üçün toplanır. Ali Xalq Məclisini ölkə lideri Kim Çen İnin partiyası idarə etsə də, hər 5 ildən bir seçkilər keçirilir. Bülletendə əvvəlcədən təsdiq edilmiş tək bir namizədin adı olur.
