Keçmiş Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov azadlığa buraxılıb.
Report yazır ki, bu barədə Sabunçu Rayon Məhkəməsi qərar çıxarıb.
Vidadi Zeynalov niyə həbs edilib?
V. Zeynalov 2015-ci ilin noyabr ayında “Bakı Telefon Rabitəsi” İstehsalat Birliyinin sabiq rəhbəri Beytulla Hüseynov və digərləri ilə birlikdə həbs edilib və onların əmlakının üzərinə həbs qoyulub. Buna səbəb olaraq V.Zeynalovun qulluq mövqeyindən sui-istifadə edərək nazirliyin strukturuna daxil olan ayrı-ayrı qurumların vəzifəli şəxsləri ilə işbirliyi edərək 73 milyon 590 min manat pul vəsaitini mənimsədiyi göstərilib.
O, Cinayət Məcəlləsinin 179.3.2-ci və 308.2-ci maddələri ilə ittiham olunub. 2017-ci ilin iyul ayında Bakı Ağır Cinayətlər Məhkəməsinin hökmü ilə V.Zeynalov 13 il azadlıqdan məhrum edilib. Daha sonra Bakı Apellyasiya Məhkəməsinin qərarı ilə onun cəzası 4 ilə endirilib. Həmçinin qərara əsasən, V.Zeynalov və digər təqsirləndirilən şəxslərin 2009-cu ilə qədər əldə olunan əmlakının üzərindən həbs götürülür və müsadirə dayandırılıb. V.Zeynalovun ailə üzvləri və digər şəxslər kassasiya şikayəti ilə Ali Məhkəməyə müraciət etsə də, sabiq Aparat rəhbəri sonradan şikayətini geri götürüb.
Bu gün isə Sabunçu Rayon Məhkəməsinin qərarına əsasən, V.Zeynalovun cəzası beşdə dördlə hesablanıb və o, azadlığa çıxıb.
