Yeni Zelandiyanın Nazirlər Kabineti ölkədə silah dövriyyəsinin nizamlanmasını nəzərdə tutan qanunvericiliyə dəyişiklik edəcək.
Euronews yazır ki, bunu Yeni Zelandiyanın Baş naziri Casinda Ardern bəyan edib.
O bildirib ki, qanunun sərtləşdirilməsi ilə bağlı müvafiq qərar 10 gün ərzində dərc ediləcək.
Ölkədə hazırda qüvvədə olan qanun nə deyir?
Yeni Zelandiyada silah satışıyla ilə bağlı demək olar ki, məhdudiyyət yoxdur. Ölkə qanunları 16 yaşına çatan hər kəsə silah sahibi olmaq haqqı verir. Avtomatik silah almaq üçün isə 18 yaşdan yuxarı olmaq lazımdır.
Cəmi 5 milyon əhalisi olan ölkədə 1,5 milyon nəfərin silahı var. Rəsmi statistikaya görə, 2017-ci ildə silah əldə etmək məqsədilə lisenziya almaq istəyənlərin 99 faizinin müraciətinə müsbət cavab verilib.
Nə baş verib: Martın 15-də Yeni Zelandiyanın Kraystçerç şəhərindəki iki məsciddə insanlar atəşə tutulub. Hadisə nəticəsində 50 nəfər ölüb, 50 nəfər isə xəsarət alıb. Hücumu təşkil edən Breton Tarrantın 5 müxtəlif silahdan istifadə etdiyi üzə çıxıb.
