İslam Partiyası Astara rayon təşkilatının sədri Ruhulla Axundzadə saxlandığı 15 saylı Cəzaçəkmə Müəssisəsində aclıq aksiyasına başlayıb.
Bu barədə Siyasi Məhbusların Monitorinq Mərkəzinin rəhbəri Oqtay Gülalıyev Facebook səhifəsində məlumat yayıb.
Onun sözlərinə görə, R. Axundzadə “kars”a (cərimə təcridxanası) salınmasına etiraz əlaməti olaraq bu addımı atıb. Onun həbsdə olan oğlu Məhəmmədəli Axundzadə də atasına dəstək olmaq məqsədilə martın 19-dan aclıq aksiyasına başlayacağını bildirib.
Hüquq müdafiəçisi bildirib ki, Axundzadənin səhhətində ciddi problemlər var. O, hər gün dərmanlar qəbul edir. Onun “kars”da saxlanması və aclıq aksiyası keçirməsi həyatı üçün təhlükəlidir.
Penitensiar Xidmətinin İctimaiyyətlə əlaqələr şöbəsinin rəhbəri Mehman Sadıqov isə “Amerikanın Səsi”nə bildirib ki, Ruhulla Axundzadə və oğlu aclıq edəcəkləri ilə bağlı rəsmi müraciət etməyiblər.
Nə baş verib: R. Axundzadə 2011-ci ilin yanvarında həbs edilib. Respublika Prokurorluğunun yaydığı məlumata görə, onun yaşadığı evin həyətindəki saxlanc yerindən 4 avtomat, 9 əl qumbarası və digər silahlar aşkar edilərək götürülüb. Ağır Cinayətlər Məhkəməsinin hökmü ilə Ruhulla Axundzadə 11 il yarım azadlıqdan məhrum edilib. Oğlu Məhəmmədəli Axundzadə isə 2016-ci ilin aprelində narkotik ittihamı ilə həbs olunub və 5 il azadlıqdan məhrum edilib.
