Bakının Nizami rayonu, Qara Qarayev prospektinin “8-ci kilometr” adlanan ərazisində yerləşən “Diqlas” Ticarət Mərkəzində yanğın baş verib. Rəsmi məlumata görə, dönərxanadan başlayan yanğın əvvəlcə paltar mağazasını, daha sonra bütün binanı bürüyüb, yaxınlıqdakı ticarət obyektlərinə də keçib və nəticədə 12 nəfər xəsarət alıb.
Saatlarla davam edən yanğını söndürmək üçün Fövqəladə Hallar Nazirliyinin Dövlət Yanğından Mühafizə Xidmətinin yanğından mühafizə bölmələri, Xüsusi Riskli Xilasetmə Xidmətinin xilasediciləri, Mülki müdafiə qoşunlarının şəxsi heyəti və Aviasiya dəstəsinin 3 ədəd helikopteri cəlb edilsə də yanğının qarşısı alına bilməyib və bina yararsız hala düşüb.
Daha əvvəl baş verən yanğın hadisələrində olduğu kimi bu hadisə zamanı da həm şahidlər, həm sahibkarlar həm də sosial şəbəkə istifadəçiləri yanğını söndürmək üçün lazımi tədbirlərin görülmədiyini iddia etdilər.
Ticarət mərkəzlərində hər mərtəbədə yanğın söndürən şlanqlar və ya ən azı 10-a yaxın yanğınsöndürən balon olmasının vacibliyi,
hadisə yerinə cəlb edilən yanğınsöndürən maşınlarda su olmamağı,
helikopterin əsasən üstü açıq ərazilərdəki yanğınların söndürülməsində istifadə edildiyi kimi fikirlər səslənib.
Bu, ilk belə hadisə deyil. Son bir neçə ildə Azərbaycanda bir çox yanğın olub ki, onun söndürülməsi vaxt aldığından dəyən ziyan artıb, hətta bəzilərində insan itkisi də olub.
Mikroskop Media son illərin ən böyük yanğın hadisələrini xatırladır.
Binəqədi. Yanan bina.
2015-ci il mayın 19-da 16 mərtəbəli yaşayış binasında baş verən yanğın nəticəsində uşaqlar da daxil olmaqla 15 nəfər ölüb, 64 nəfər yaralanıb. Hadisə Bakının Binəqədi rayonunda səhər saatlarında baş verib. Yanğının başlamasına və bir neçə dəqiqədə bütün binanı bürüməsinə səbəb kimi binanın üzərinə çəkilmiş penoplas üzlüklər göstərilib.
“Günəşli” yanğını
2016-cı il dekabrın 4-də “Günəşli” neft yatağında güclü yanğın olub. Hadisə “Günəşli” neft yatağının 10 saylı dərin dəniz özülündə baş verib. Nəticədə 15 neftçi dünyasını dəyişib, 18 nəfər isə itkin düşüb. 6 dekabr matəm günü elan olunub.
Narkoloji dispanser
2018-ci il mart ayının 2-si, saat 06:10-da Bakı şəhərinin Xətai rayonu ərazisində yerləşən Respublika Narkoloji Mərkəzinin birmərtəbəli korpusunda yanğın baş verib. Hadisə zamanı korpusda olan 55 nəfərdən 30-u xilas edilib, 25 nəfərin isə meyiti aşkar olunub və ölənlərin hamısı orada müalicə alanlar olub. İlkin olaraq yanğının binanın elektrik şəbəkəsində yaranmış nasazlıq səbəbindən baş verdiyi bildirilib. Daha sonra isə yanğını mərkəzin pasiyenti, Bakı şəhər sakini Məhəmməd Məmmədovun intihar məqsədilə törətdiyi açıqlanıb.
Hadisə ilə bağlı yayılan məlumatlarda deyilib ki, binanın pəncərələrində dəmir barmaqlıqlar olub və otaqların qapısı bağlı olduğundan ölənlərin sayı daha çox olub.
Bütün ölkəni işıqsız qoyan yanğın – Mingəçevir İES
3 iyul 2018-ci ildə ölkənin Mingəçevir şəhərindəki ən böyük elektrik stansiyası Azərbaycan İES-in 1-ci və 6-cı enerji blokunda yanğınla müşahidə olunan partlayış baş verib. FHN-nin Mingəçevir və ətraf rayonlardan olan yanğından mühafizə hissələri hadisə yerinə gəlib.
Partlayış bütün ölkənin enerji təchizatında ciddi problem yaradıb və səbəbinin də həddindən artıq yüklənmə olduğu açıqlanıb. Nəticədə paytaxt Bakı da daxil olmaqla respublikanın müxtəlif bölgələrində elektrik enerjisinin verilməsi dayandırıldı.
Hadisədən sonra Etibar Pirverdiyev “Azərenerji” Açıq Səhmdar Cəmiyyətinin (ASC) prezidenti vəzifəsindən azad edildi.
Yataqxanalardakı yanğınlar
2018-ci ilin noyabrın 13-də Binəqədi rayonu, Rəsulzadə küçəsindəki binada qısaqapanmadan başlayan yanğın evləri yararsız hala salıb. Əvvəllər sanatoriya olan, sonradan isə məcburi köçkünlərin məskunlaşdığı yataqxanada 103 ailə yanğından sonra Binəqədi Rayon İcra Hakimiyyətinin təşkil etdiyi çadırlara sığınıb.
Daha sonra kirayəyə çıxmaları üçün hər ailəyə 300 manat pul yardımı edilib. Qaçqınların və Məcburi Köçkünlərin İşləri üzrə Dövlət Komitəsi yanğın nəticəsində müvəqqəti yaşayış yerindən məhrum olan 46 ailəni kirayə mənzillərdə yerləşdirməyi qərara alıb.
Qısaqapanmandan yaranan daha bir yanğın
Martın 6-sı Nərimanov rayonunda, Malik Məmmədov 12 ünvanında Ağdam rayonundan olan məcburi köçkünlərinin məskunlaşdığı yataqxananın 3-cü mərtəbəsində yanğın baş verib. Azərbaycan Dövlət Mədəniyyət və İncəsənət Universitetinin balansında olan binadakı yanğın zamanı 6 nəfər tüstüdən boğulmaq təhlükəsi ilə üzləşib və yanıq xəsarəti alıb. 2 nəfər – Surxay Əliyev və Elza Əliyeva isə ölü tapılıb. İlkin ehtimala görə, hadisəyə binanın elektrik xətlərindəki qısaqapanma səbəb olub.
YAP rəsmisinin qəsdən törədildiyini ehtimal etdiyi yanğın
Martın 8-də bu dəfə Yasamal rayonunda məcburi köçkünlərin məskunlaşdığı beşmərtəbəli yataqxana binasının birinci mərtəbəsində yanğın olub. Hadisə zamanı 4 nəfər bina sakini təxliyə olunub, xəsarət alan olmayıb.
Yeni Azərbaycan Partiyası (YAP) sədrinin müavini-icra katibi Əli Əhmədov ard-arda baş verən iki yanğına belə reaksiya verib:
Araşdırmaq lazımdır ki, burada hər hansı bir yanğın törətmə əməli olub, yoxsa yox? Qısa bir zamanda bir neçə yanğının olması bizdə belə fikirlərin yaranmasına səbəb olur. Ona görə də hüquq-mühafizə orqanları bunun üzərində ciddi işləyirlər.
