Bir neçə gün əvvəl yenidən həbs olunan keçmiş siyasi məhbus Bayram Məmmədovun apelyasiya şikayəti təmin olunmayıb.
Məhkəmədə B. Məmmədov bildirib ki, Binəqədi təcridxanasında o, iki nəfər tərəfindən döyülüb və onun burun, qulaq, diz və gicgah nahiyəsində işgəncə izləri var. Kamerada onun ayaqlarını və əllərini gecədən səhərə qədər bağlı saxlayıblar.
Onun əllərindəki qandalı məhkəmədə də açmayıblar.
B. Məmmədovun sözlərinə görə, ona statuslarına və müsahibəsinə görə xəbərdarlıq edilib:
Azadlığa buraxılanda da məni yenidən həbs olunacağımla bağlı hədələmişdilər
Blogger Mehman Hüseynov isə bildirib ki, B.Məmmədov işgəncəyə məruz qaldığını deyəndə hakim ondan hansısa qanunu pozub-pozmadığını soruşub:
Bayram isə dedi ki, qanunu pozanda adamı döyərlər? Məhkəmədən çıxdım. Bayram məhkəmədə döyüldüyünü, ona polis idarəsində dəhşətli fiziki işgəncələr verildiyini deyib. Üzündə göyərtilər var, qulağı şişib, gözünün altı göyərib. Onun əlinə qandal vurub, diz üstünə çökdürüb təpik yumruqla döyüblər
Nə baş verib: Heykəl məhbusu kimi tanınan B. Məmmədov əfv sərəncamı ilə azadlığa buraxıldıqdan 13 gün sonra yenidən həbs edilib. O, polisin qanuni əmrinə tabe olmamaqda təqsirli bilinib və 30 gün müddətinə inzibati həbs cəzası alıb.
