“Müsəlman Birliyi” hərəkatının Türkiyədə saxlanılaraq, Azərbaycan hökumətinə təhvil verilən üzvü Anar Cabbarovun harada saxlanıldığı bilinmir.
Martın 22-də Bakıya gətirilən A.Cabbarovun ailə üzvləri dünən onun Kürdəxanıdakı 1 saylı Bakı İstintaq Təcridxanasına köçürüldüyü haqda məlumat alıb. Amma onlara bildirilib ki, təcridxanaya Anar Cabbarov adlı şəxs gətirilməyib.
Anası Hökümə Cabbarova Meydan TV-yə bildirib ki, oğlunun Nardaran hadisələrinə görə saxlanılması inandırıcı deyil:
İnternetdə yazıblar ki, guya Nardaran hadisələrinə görə axtarışda olub, ona görə Türkiyədə tutub gətiriblər. Yalandır. Anar Nardaran hadisələrindən sonra dəfələrlə Azərbaycana gedib-gəlib. Nardaran hadisələrilə bağlı məhkəmədə şahid kimi dindirilib
Vəkilinin də Anarla görüşünə imkan verilmədiyini deyən H.Cabbarova oğlunun yerini öyrənmək üçün dünən yenidən Daxili İşlər Nazirliyinə, Baş Prokurorluğa, Ombudsman Aparatına müraciət edib.
Nə baş verib: A.Cabbarovu martın 15-də Türkiyədə sənədlərində problem səbəbilə əvvəlcə polis idarəsinə, sonra Deportasiya İdarəsinə, daha sonra isə Azərbaycanın İstanbuldakı Baş Konsulluğuna aparıblar. Martın 22-də o, Azərbaycana təhvil verilib. Daxili İşlər Nazirliyi A.Cabbarovun saxlanma səbəbi və yeri barədə heç bir məlumat vermir.
