Bayram Məmmədov. Foto: screenshot / Mehman Hüseynov

Keçmiş siyasi məhbus Bayram Məmmədov inzibati həbs olunan şəxslərin saxlanma məntəqəsində üzləşdiyi döyülmə və işgəncə halları ilə bağlı izahat yazıb.

Polisin qanuni əmrinə tabe olmamaqda təqsirli bilinərək 30 sutka azadlıqdan məhrum edilən B.Məmmədov əlləri arxadan bağlandıqdan sonra 5-6 nəfər polisin onu yumruq və təpiklə döydüyünü yazıb:

Sonra mən müvazinətimi itirdim yerə yıxıldım, yerdə məni təpikləməyə və üzümə yumruq zərbələri ilə vurmağa başladılar. Bu, təxminən 30-40 dəqiqə çəkdi, arada fasilələr verib niyə peşman olmadığımı öz müsahibəmdə bildirdiyimi, niyə Facebook sosial şəbəsində onlara görə radikal və aqressiv tərkibli statuslar yazdığımı irad bildirərək döyürdülər

O, izahatında qeyd edib ki, döyüləndən sonra ayaqları da əllərinə qandalla bağlı halda 2-3 saat ağzı üstə uzanıqlı vəziyyətdə saxlanılıb. B.Məmmədov ona verilən işgəncə hallarının araşdırılmasına köməklik etməyi tələb edir.

Nə baş verib: B.Məmmədovun vəkili Elçin Sadıqov bu gün onunla görüşüb və bildirib ki, əfv sərəncamı ilə yenicə azadlığa buraxıldıqdan sonra həbs edilən fəalın üzləşdiyi işgəncə ilə bağlı Baş Prokuror Zakir Qaralova, onun müavini Rustəm Usubova, daxili işlər naziri Ramil Usubova yazılı şikayət edib.