Beynəlxalq hüquq-müdafiə təşkilatı “Freedom House” Azərbaycanda siyasi fəallara və LGBT nümayəndələrinə qarşı yeni təqib dalğasını pisləyib.
Təşkilatın Avropa və Avrasiya proqramları üzrə direktoru Mark Berendt Azərbaycan hökumətini buna son qoymağa çağırıb:
Bu həbslər prezident İlham Əliyevin əfv sərəncamında öz ifadəsini tapmış xoş məramı heçə endirir və Azərbaycanda müxalifətə, söz azadlığına təzyiqlərin davam etdiyindən xəbər verir
Nə baş verib: Aprelin 1-də Bakıda polis çoxu transseksual olmaqla 14 LGBT nümayəndəsini saxlayıb. Məlumatlara görə, saxlanılan şəxslər tibbi müayinədən keçməyə məcbur olublar. Bir nəfər “xırda xuliqanlıq”da günahlandırılıb, digərləri 30 sutka həbs olunub və ya cərimə ediliblər.
Bundan əlavə, NİDA Hərəkatının üzvü Bayram Məmmədov əfv edildikdən iki həftə sonra yenidən saxlanılıb və itaətsizlik ittihamı ilə 30 sutka həbs olunub. Appelyasiya Məhkəməsində o, işgəncəyə məruz qaldığını bildirib. Digər keçmiş siyasi məhbus Qiyas İbrahimov da “profilaktik söhbət” adı altında polis məntəqəsinə aparılıb, daha sonra sərbəst buraxılıb.
