Foto: Getty images

Baş Prokuror yanında Korrupsiyaya Qarşı Mübarizə Baş İdarəsi Şəmkirdə əməliyyat keçirərək Rayon Kommunal Təsərrüfat Birliyinin (RKTB) rəisi Teymur Hacıyevi yaxalayıb.

T.Hacıyev 1 ildən artıq müddətdə 70 fəhlənin əmək haqqını mənimsəməkdə ittiham olunur. Onun iş yerində və evində aparılan yoxlamalar zamanı 70 ədəd maaş kartı götürülüb.

Əməliyyat zamanı aydın olub ki, Əmək və Əhalinin Sosial Müdafiəsi Nazirliyinin Şəmkirdəki “DOST” mərkəzi 500 nəfərin işlə təminatını həyata keçirərkən onları RKTB-nin xətti ilə işə götürüb. T. Hacıyev 500 nəfərdən 70-nin maaş kartını özündə saxlayıb. Adları işçi kimi qeydiyyata alınsa da, həmin işçilər işə çıxmayıblar. Onların adına maaş kartlarına hər ay  170 manat məvacib köçürülüb. Beləliklə, T. Hacıyev ayda 12 min manata yaxın pulu mənimsəyib.

Bundan başqa, T.Hacıyevin işdə olan fəhlələrə qarşı da qanunsuzluqlara yol verdiyi bildirilir. Elə idarənin əməliyyat keçirməsinə də işçilərin ondan şikayətləri səbəb olub. İşçilər hüquq-mühafizə orqanlarına yazdıqları şikayətlərdə T. Hacıyevin onları hər ay maaşlarından pul verməyə məcbur etdiyini bildiriblər.