İsraildə parlament seçkiləri ilə bağlı “exit-poll”un ilkin nəticələrinə əsasən, seçkini hazırkı baş nazir Binyamin Netanyahu qazanıb.
Euronews yazır ki, ölkənin ən nüfuzlu 3 televiziya kanalı seçkilərdə Netanyahunun partiyası “Likud”un liderlik etdiyi sağ blokun qalib gəldiyini elan edib.
Bildirilir ki, hazırda seçki qutularının 97 faizi açılıb və sağ blok ümumilikdə 120 nəfərlik Knessetdə (İsrail parlamenti) 65-67 millət vəkil ilə yer tuta bilər.
Qələbəsini elan edən Netanyahu “Twitter”də yazıb:
Likud” partiyası başda olmaqla sağ blok aşkar qələbə qazanıb. Mən etimada görə İsrail vətəndaşlarına təşəkkür edirəm. Bu gün axşam bizim tərəfdaşlarla hökuməti yaratmağa başlayacağam
Ancaq “Jersualem Post” seçkidə Netanyahunun ən böyük rəqibi, İsrail Ordusunun sabiq Baş qərargah rəisi Beni Hansın rəhbərlik etdiyi Mavi-Ağ İttifaqının (“Kahol-Lavan”) qalib gələ biləcəyini yazıb. Qəzet bütün seçki qutuları açıldıqdan sonra nəticənin Beni Hansın xeyrinə dəyişilə biləcəyini deyir. Beni Hans da sosial şəbəkədə “Qazandıq” yazıb.
- İsraildə hökuməti qurmaq üçün parlamentdə ən az 61 millət vəkili ilə təmsil olunmaq lazımdır. Bu dəfəki seçkidə heç bir partiya təklikdə həmin saya yaxınlaşa bilmədiyi üçün İsraili koalisiya hökuməti gözləyir. Seçkilərin rəsmi nəticəsi cümə günü elan olunacaq. Seçki Komissiyasının 17 apreldə nəticələri təsdiqləməsindən sonra prezident Reuven Rivlin partiya liderlərindən birinə koalisiya hökumətinin qurulması barədə göstəriş verəcək.
