Bakının Qaradağ rayonu, Qobustan qəsəbəsində 321 nömrəli məktəbdə müəllimin şagirdi döydüyü ilə bağlı xəbər yayılıb.
Virtualaz.org yazır ki, xəsarət alan 7-ci sinif şagirdi Aqşin Hüseynov təcili tibbi yardım maşını ilə Kliniki Tibbi Mərkəzə gətirilib. Şagirdə kəllə-beyin travması diaqnozu qoyulub. Məlumatı Səhiyyə Nazirliyinin mətbuat xidmətinin rəhbəri Pərviz Abubəkirov təsdiqləyib.
Adı çəkilən məktəbin hadisə ilə bağlı yaydığı məlumatda isə deyilir ki, məktəbli döyülməyib, özünü pis hiss edərək yıxılıb:
Aprelin 12-si saat təxminən 11:30 radələrində məktəbin VII sinif şagirdi riyaziyyat dərsində özünü pis hiss edərək yıxılıb və başı dəyib. Sinif rəhbəri şagirdin doğma xalasıdır. Hadisə olan kimi dərhal valideynə məlumat verilib və təcili-tibbi yardım çağırılıb. Onunla birlikdə xəstəxanaya gedən atası şagirdin halının yaxşı olduğu bildirib. Güclü baş ağrıları olduğu üçün onun valideyni dəfələrlə həkimə müraciət edib
Məktəbin məlumatında Bakı Şəhəri üzrə Təhsil İdarəsinin xidməti araşdırma apardığı, araşdırmanın nəticələri haqqında əlavə məlumat veriləcəyi qeyd olunub.
