Hüquq müdafiəçisi Oqtay Gülalıyev istintaq zamanı hərbçi İsmayıl Hüseynova işgəncələr verilməsi və onun həbsxanada intihara cəhd etməsi barədə məlumat yayıb.
O, İ.Hüseynovun anasına istinadən yazıb ki, dövlətə xəyanətdə ittiham olunan hərbçi işgəncələrə məruz qalıb:
Onu üç saat ayağından asıblar və başından elektrik cərəyanı keçiriblər. Huşunu itirənə qədər döyüblər, ermənilərə işlədiyini etiraf etməsini tələb edərək digər alçaldıcı hərəkətlər ediblər. Bir əsgər onun yanında ölüb. Ona deyiblər ki, etiraf etməsə, onu da öldürəcəklər. Bu işgəncələr altında onu etiraf etməyə məcbur ediblər və məhkəməyə veriblər. Qapalı keçirilən prosesdə o, dövlətə xəyanətdə təqsirli bilinib
O.Gülalıyevin sözlərinə görə, qardaşı İsmayılın mənəvi və fiziki travmalara dözməyərək və məhkəmənin ədalətsizliyinə etiraz olaraq aprelin 14-də 12 saylı cəzaçəkmə müəssisəsində damarını kəsdiyini deyib:
Onun vəziyyəti ağırdır. Hadisə yerinə Dövlət Təhlükəsizliyi Xidmətinin əməkdaşları gəliblər
Penitensiar Xidmətin ictimaiyyətlə əlaqələr şöbəsindən Turan-a verilən məlumatda intihara cəhd xəbəri təkzib edilib.
Lakin məhbusun anası Məhsəti Hüseynova xəbəri təsdiqləyib və deyib ki, oğlu daha öncə də özünü asmaq istəyib, ancaq onu vaxtında xilas ediblər, indi isə damarını kəsib. Onun sözlərinə görə, işgəncələr nəticəsində İ.Hüseynovun daxili orqanları zədələnib və böyrəklərindən əməliyyat olunub.
Nə baş verib: Bir qrup hərbçi 2017- ci ilin may ayında müəmmalı şəkildə öldürülüb, daha sonra hərbçilərin həbsi başlayıb. İsmayıl Hüseynov həmin il, mayın 18-də gecə saat üçdə Gəncədəki evindən Tərtərə aparılıb. O, dövlətə xəyanətdə təqsirli bilinib və 15 il azadlıqdan məhrum edilib.
