Dünən Notr-Dam kilsəsində yanğın başlayandan sonra yazıçı Viktor Hüqonun bundan 188 il öncə çap olunan “Notr-Dam kilsəsinin qozbeli” (“Notre-Dame de Paris”) romanı bütün dünyada yenidən gündəmə gəlib.
Əsər bir gecədə “Amazon”un ən çox satılanlar siyahısında ən yüksək pilləyə qalxıb.
Orijinalı 940 səhifə olan roman hazırda Fransada ən sürətli satılan kitabdır. İngilis dilinə tərcüməsi bütün dünyada bu janrdakı kitablar arasında ən çox satılan olub.
Romanın “Disney” tərəfindən ekranlaşdırılan animasiya filmi isə hazırda “ən çox izlənilən 10 ailə filmi” siyahısına düşüb.
İnternet istifadəçiləri dünən gecədən bəri romandan müxtəlif hissələri sosial şəbəkələrdə paylaşırlar.
V.Hüqo əsəri 1829-cu ildə yazmağa başlayıb. Yazıçı bu romanı o vaxt yaxşı restavrasiya edilməyən və yerini yeni inşaatların alması təhlükəsi ilə üzləşən kilsəni xilas etmək məqsədilə yazıb. Roman 1831-ci ildə çap edildikdən sonra gözlənilən nəticəni verib və katedral layiq olduğu dəyəri görüb.
https://www.facebook.com/MikroskopMedia/posts/366947470696668
