Banqladeşdə seksual zorakılığa məruz qalan 19 yaşlı Nusrat Cahan Rafi bu barədə polisə şikayət edəndən sonra yandırılıb və xəstəxanada vəfat edib.
BBC yazır ki, Nusrat Cahan ölümündən 2 həftə öncə təhsil aldığı mədrəsənin rəhbərinin seksual qısnamasına məruz qalıb. Bunla bağlı ailəsi ilə birgə polisə şikayət edib. Bunu böyük problem hesab etməyən polis gənc qızı telefonu ilə videoya çəkib və bunu mediaya göndərib.
Nusratın şikayətindən sonra mədrəsənin rəhbəri saxlanılıb, amma 2 oğlan tələbə onun azad edilməsi tələbi ilə aksiya təşkil edib və siyasətçilər də ona dəstək olub.
N.Rafi aprelin 6-da imtahan vermək üçün mədrəsəyə getməli olub və onunla birgə gedən qardaşı Mahmudul Həsən Nomana məktəbə daxil olmağa icazə verilməyib.
Mədrəsənin 5 qız tələbəsi N.Rafini aldadaraq binanın damına aparıb və onun üstünə kerosin tökərək yandırıblar.
Polisin sözlərinə görə, qızlar hadisəni intihar kimi qələmə vermək istəsə də N.Rafinin yaralı halda qaçması planı pozub. O, başına gələnləri təcili yardım maşınında qardaşına danışıb və bununla da hadisənin intihar olmadığını sübut etmək mümkün olub. Bədəninin 80 faizi yanan Nusratı xilas etmək mümkün olmayıb.
Yas mərasimində minlərlə insan iştirak etdikdən sonra polis hadisə ilə əlaqəli olduğundan şübhələndiyi 15 nəfəri həbs edib. N.Rafini videoya çəkən polis işdən çıxarılaraq başqa bir yerə transfer edilib. Ölkənin baş naziri Şeyx Xasina gənc qızın ailəsi ilə görüşüb və onlara bu cinayətdə rolu olan hər kəsin məsuliyyətə cəlb olunacağı barədə söz verib.
N.Rafinin ölümü minlərlə insanın etirazına səbəb olub. Sosial şəbəkələrdə ölkədəki qadınların üzləşdikləri bu cür problemlərə bağlı minlərlə şərh yazılıb.
Hüquq müdafiəçisi və Qadın Hüquqşünaslar Assosiasiyasının keçmiş direktoru Salma Ali deyir ki, Banqladeşdə bir qadın məruz qaldığı seksual qısnama və ya təcavüzlə bağlı ədalət tələb etmək istəyəndə daha çox təzyiqə məruz qalır:
Məhkəmə işi illərlə uzadılır, polislər məsələni araşdırmaqda həvəsli olmur, cinayətkarlar cəzalandırılmır və eyni cinayəti təkrarlamağa davam edirlər
