Daxili İşlər Nazirliyi AXCP sədrinin müavini Fuad Qəhrəmanlının qızına küçədə hücum edilməsi və təhqir olunmasına münasibət bildirib.
DİN-in Mətbuat Xidmətinin rəis müavini Orxan Mansurzadə Qafqazinfo-ya deyib ki, bu hadisə ilə də bağlı “102 Xidməti”nə müraciət edilib:
Həmin yeniyetmə və anası Yasamal Rayon Polis İdarəsinin 28-ci Polis Bölməsinə dəvət olunub. Faktla bağlı ərizə alınıb, araşdırma aparılır. Nəticədən asılı olaraq hadisəyə hüquqi qiymət veriləcək
Nə baş verib: Dünən YAP-ın Suraxanı rayon təşkilatının üzvü Tural Qarayevin AXCP sədrinin müavini Fuad Qəhrəmanlının 14 yaşlı qızı Sanay Yağmura hücum edib. Sanay Yağmurun sosial şəbəkələrdə yaydığı məlumatda Tural Qarayevin onu təhqir etdiyini və ona qarşı fiziki güc işlətdiyini bildirib. Onun anası Zümrüd Yağmurun sözlərinə görə, Tural Qarayev hədə-qorxu gələrkən prezident İlham Əliyevdən və xanımı Mehriban Əliyevadan üzr istəməsini tələb edib.
