Beynəlxalq hüquq müdafiə təşkilatı Amnesty International İranda həbsdə olunan qadın hüquqları müdafiəçilərinin azadlığa buraxılmasını tələb edib.
Təşkilatın bəyanatında deyilir ki, İran hakimiyyəti məcburi örtünməyə qarşı dinc etiraz edənlərin həbsini dayandırmalı və hazırda həbsdə olanları dərhal azad etməlidir.
“Amnesty International”ın Yaxın Şərq və Şimali Afrika üzrə direktor müavini Maqdalena Muhrabi deyir ki, hicab taxmadığı üçün qadınları cinayətkar hesab etmək gender əsaslı ayrı-seçkilikdir.
Nə baş verib: Aprelin 10-u İranda qadın hüquqları müdafiəçisi Yasmin Aryani, növbəti gün isə onun harada olduğunu öyrənmək üçün polisə gedən anası Monireh Arabşahi həbs edilib. Hər iki qadının həbs edilməsinə səbəb onların 8 mart Beynəlxalq Qadınlar Günündə metroda hicabsız formada çəkib yaydıqları video olub. Qadınlar sistemə qarşı təbliğat aparmaq və fahişəliyə cəlb etmək də daxil olmaqla bir çox maddədə ittiham olunurlar. Monireh Arabşahiyə təmiz su, qida və dərman verilməyən “Şahr-e Rey” həbsxanasında saxlanıldığı və açıq havaya çıxmasına icazə verilmədiyi bildirilir.
Həbsdə olan digər qadın hüquq müdafiəçisi Vida Movahedi isə “İnqilab küçəsinin qızı” kimi tanınır. O, ilk dəfə 2017-ci ilin dekabr ayında etiraz aksiyası keçirib. İnqilab meydanında hicabını çıxarıb, onu bir çubuğun ucuna keçirərək bayraq kimi yellədib. Axırıncı dəfə onun həbs edilməsinə 29 oktyabr 2018-ci il tarixində yenə eyni meydanda bu dəfə əlində rəngli şarlarla keçirdiyi etiraz aksiyası səbəb olub.
