Həbsdə olan araşdırmaçı jurnalist Əfqan Muxtarlı gözündə güclü ağrılar əmələ gəldiyini və uroloji müayinədən keçməli olduğunu deyib. Bu barədə onun həyat yoldaşı Leyla Mustafayeva məlumat verib.
Penitensiar Xidmət nə ilə məşğuldur? İndiyədək olunan müayinələrin rəsmi nəticələri haqda əlimizdə bir sənəd də yoxdur. Adamın sağlamlığı ilə bağlı xeyli problemləri var, amma müayinələrin detalları haqqında əlimizdə bir sənəd də yoxdur. Dövlət sirri kimi gizlədirlər. Əfqanın şəkəri və təzyiqi var.
Həyat yoldaşı deyir ki, Ə.Muxtarlı şəjərli diabetə görə hələ də Gürcüstandakı həkimin yazdığı dərmanları qəbul edir. L.Mustafayeva jurnalistin həyatına təhlükə olacağı təqdirdə məsuliyyəti ölkə rəhbərliyinin daşıdığını deyib:
Oğurlayıb həbs etdiyinizi boynunuza almadınız, amma sağlığından dolayı başına bir iş gəlsə, boynunuzu heç nədən qaçırda bilməyəcəksiniz.
Nə baş verib: Gürcüstanda yaşayan araşdırmaçı jurnalist Əfqan Muxtarlı 2017-ci il mayın 29-da yaşadığı evin yaxınlığında oğurlanıb. Bundan sonra Azərbaycana gətirilib. O, dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri üzrə təqsirli bilinib və 6 il müddətinə azadlıqdan məhrum edilib.
