Şimali İrlandiyada Böyük Britaniyaya qarşı “müstəqillik üsyanı” kimi də tanınan Pasxa üsyanının ildönümünə görə aksiyalar keçirilib. Aprelin 19-da Derri şəhərində baş tutan etiraz aksiyası zamanı polislə aksiyaçılar arasında qarşıdurma olub. Hadisə yerində 29 yaşlı jurnalist Lira MakKi odlu silahla vurulub. Xəstənaxanaya aparılan jurnalisti xilas etmək mümkün olmayıb.
Şimali İrlandiya polisi L. MakKinin ölümünü terror hücumu adlandırıb və özünü “Yeni IRA” (İrlandiya Respublika Ordusu) adlandıran təşkilatın şübhəli olduğunu açıqlayıb.
Hadisə ilə əlaqədar cinayət işi açılıb, istintaq gedir.
Lira MakKi kim idi: O, “Buzzfeed”, “Private Eye”, “The Atlantic and Mosaic Science” kimi müxtəlif media orqanlarında fəaliyyət göstərib. Son vaxtlar isə “Mediagazer” üçün işləyib.
2006-cı ildə “Sky News” onu ilin gənc jurnalisti seçib. 2016-cı ildə isə “Forbes” jurnalının Avropada “30 yaşa qədər 30 jurnalist” siyahısında yer alıb.
O, “The Lost Boys” adlı 2 cildlik kitabının 2020-ci ildə nəşri üçün “Faber ve Faber” nəşriyyatı ilə müqavilə imzalayıb.
Dostları, iş yoldaşları və tanışları onu LGBT hüquqlarının müdafiəçisi, dini tolerantlığa inanan, ağıllı jurnalist kimi xatırlayırlar.
“Centre for Democracy and Peace Building”in əməkdaşı Eva Qrosman gənc jurnalisti 2017-ci ildə TED çıxışına dəvət etdiyi vaxtı belə xatırlayır:
“O, bunu 2016-cı ildə Floridanın Orlando şəhərində homoseksualların toplandığı gecə klubuna təşkil edilən və 49 nəfərin ölümü ilə nəticələnən hücuma diqqət çəkmək üçün bir fürsətə çevirdi”.
“Rainbow” layihəsinin direktoru John O’Doherty onun LGBT icmasında çoxları üçün qəhrəman olduğunu deyir.
Jurnalistin sonuncu yazısı intihar edən gənclərin sayının sürətlə artması barədə olub.
