Şri-Lankada baş verən partlayışlar nəticəsində ölənlərin sayı 321-ə çatıb.
Reuters yazır ki, ölənlərin çoxu Şri-Lanka vətəndaşı olsa da, ümumilikdə 12 ölkənin 38 vətəndaşı həyatını itirib.
Hadisələrlə bağlı indiyə kimi biri suriyalı olmaqla 40 nəfər şübhəli şəxs qismində saxlanılıb.
Şri Lankanın müdafiə naziri Dinendra Ruvan Viyevardene bu terror hücumlarının Yeni Zenlandiyadakı hadisələrin intiqamını almaq üçün törədilməsindən şübhələndiklərini deyib.
Partlayışlardan sonra məlum olub ki, Şri-Lanka hökuməti radikal müsəlman qruplaşmanın kilsələrə hücum edə biləcəyi barədə xəbər alıb, amma heç bir tədbir görülməyib.
ABŞ prezidenti Donald Tramp dünən Şri-Lankanın baş naziri Ranil Vikremesinqxeyə zəng edərək cinayətkarların həbsində onlara dəstək olacağına söz verib. Şri-Lankanın istəyinə əsasən terror hücumları ilə bağlı istintaqa Interpol və Federal Təhqiqatlar Bürosu (FBI) da kömək edəcək.
Nə baş verib: Şri-Lankanın paytaxtı və ona yaxın bölgələrdə gün ərzində ümumilikdə 8 partlayış törədilib. Terrorçular 3 kilsə, 3 otel və daha 2 yerdə partlayış törədib. Yüzlərlə insan ölüb, 500-dən çoxu yaralanıb. Terror aktını “Milli Tavhid-Camaatı” adlı radikal müsəlman qruplaşmasının 7 terrorçu-kamikadze ilə törətdiyi məlum olub.
- Şri-Lankada 21 milyonluq əhalinin 70 faizi buddist, 12 faizi hindu, 10 faizi müsəlman, 7 faizi isə xristiyandır.
