Qazıntılar zamanı üzə çıxarılan tarixi abidələrin qalıntıları. Foto: Yunanıstan Mədəniyyət Nazirliyi

Yunanıstanın Selanik şəhərindəki metro stansiyası üçün aparılan qazıntılar zamanı minlərlə arxeoloji əsər tapılıb. Buna görə də qazıntı təxirə salınıb.

Sputnik yazır ki, arxeoloqlar indiyə kimi qızıl sikkələr, zinət əşyaları, mərmər heykəllər, şamdanlar və ətir şüşələri də daxil olmaqla 300 mindən çox əsəri üzə çıxarıb. Tapılan əsərlər arasında ilahə Afroditanın da heykəlləri var.

Bundan əlavə villalar, dükanlar, atelyelər və erkən xristiyan dövrünə aid kilsənin qalıntıları, eləcə də 6-cı əsrdə Selanikin mərkəzindən keçdiyi deyilən daş döşənmiş yol (Decumanus Maximus) üzə çıxarılıb.

Bildirilir ki, həmin ərazidən belə dəyərli tarixi əsərlərin tapılması təəccüblü deyil. Selanik şəhəri e.ə 4-cü əsrdə salınıb. Şəhər Roma İmperatorluğu, daha sonra isə Bizans İmperatorluğunun mühüm ticarət və hərbi mərkəzi olub. 14-cü əsrdə 100 mindən çox əhalinin yerləşdiyi Selanik orta əsrlərin ən güclü şəhərlərindən biri olub.

Attiko Metro şirkətinin rəhbəri Yannis Milopoulos deyib ki, 100 metr uzunluğundakı daş döşəməli yolun olduğu kimi saxlanmasına və Eleftherios Venizelos stansiyasına daxil edilməsinə qərar verilib.