Müharibə meydanında məğlub edilən İŞİD terrorun yeni mərhələsinə keçid edib.
CNN yazır ki, aprelin 21-də Şri-Lankada 8 partlayış törədib 250-dən çox insanın ölümünə səbəb olan kamikadzelərin videosu yayılıb.
Şri-Lankadakı hücumlardan bir neçə gün sonra İŞİD-in onlayn nəşri “Əl Nəba” yazırdı:
Yeni arenalarda xilafət bayrağını qaldırmaq… Günlər Allahın düşmənlərini daha çox xəyal qırıqlığına uğratmağa hamilədir
Bunlar İŞİD-in qlobal təhdid olmadığı barədə xəbərlərin təkzib olunması kimi qiymətləndirilir.
İŞİD-in hədəfində hansı ölkələr var: Kəşfiyyat mənbələri İŞİD döyüşçülərinin bəzilərinin İrandan Pakistanın Bəlucistan vilayətinə və Əfqanıstana getdiyini deyir. Həmçinin İŞİD-in Hindistanı gələcək vəd edən, münbit torpaq hesab etdiyi və buradakı müsəlman-hindu gərginliyini artırmağa çalışacağı bildirilir. Bir qrup İŞİD-çi isə İordaniya və Səudiyyə Ərəbistanına gedib.
İndoneziya, Malayziya, Misir, Səudiyyə Ərəbistanı və İordaniya İŞİD-çilərin təhlükə yarada biləcəyi ölkələr olduğu bildirilir.
Təşkilatın pulu nə qədərdir: Birləşmiş Millətlər Təşkilatında (BMT) İŞİD, Əl-Qaidə və Taliban üzrə monitorinq qrupunun koordinatoru Edmund Fitton Braunun sözlərinə görə, təşkilatın aktivləri 50-300 milyon dollar dəyərindədir. İŞİD-in gəlirləri qanuni işlərə investisiya qoyularaq, banklar və borca pul verənlər vasitəsilə “yuyulub”.
