“Sarı jiletlilər”in aksiyalarının davam etdiyi Fransada 1 May Beynəlxalq Əmək gününə görə təhlükəsizlik tədbirləri daha da gücləndirilib.
Euronews yazır ki, Fransanın daxili işlər naziri Kristof Kastaner paytaxt Parisdə təşkil edilən 1 May aksiyalarında zorakılığın baş verməsindən narahat olduqlarını deyib.
Onun sözlərinə görə, bu gün Parisdə 7 min 400-dən çox polis xidmət edəcək. 2 minə yaxın “radikal aksiyaçı”nın Parisdəki mitinqlərdə iştirak edəcəyini vurğulayan K.Kastaner Tuluza və Renn kimi şəhərlərdə isə mitinqlərin qadağan edildiyini açıqlayıb.
Dünən isə Paris Baş Polis İdarəsinin rəisi Didier Lallement Parisdə aksiyaların keçiriləcəyi yerlərə yaxın olan bütün restoran və mağazaların 1 günlük bağlı saxlanılması barədə göstəriş verib.
“Sarı jiletlilər”in aksiyaları 2018-ci ilin 17 noyabr tarixindən bəri davam edir.
