Foto: İzolda Ağayeva / facebook

Bazar ertəsi jurnalistlər Natiq Cavadlı, İzolda Ağayeva, Səlimə Cəlilova və yazar Rasim Qaraca Baş Prokurorluğun Ağır Cinayətlərə qarşı Mübarizə İdarəsinə dəvət olunub.

Onlara 4 il (2015-ci ildən) qüvvədə olan ölkədən çıxış qadağasının ləğv edildiyi bildirilib.

Natiq Cavadlı deyib ki, onları Baş Prokurorluq İdarəsinin rəisi Eldar Əhmədov dəvət edib:

Zərurətin aradan qalxması ilə əlaqədar ölkədən çıxış qadağasının ləğv edildiyi barədə öz imzaladığı bildirişi təqdim edib

Meydan TV üçün materiallar hazırlamış ən az 8 jurnalistin də ölkədən çıxış qadağasının ləğv ediləcəyi gözlənilir.

Nə baş verib: Mayın 3-də ölkədən çıxış qadağası olan 10-a yaxın jurnalist Baş Prokurorluğun istintaq idarəsi önündə aksiya keçirib. Onlara qoyulan stopun ləğv edilməsini tələb ediblər.

Meydanın cinayət işi: Baş ofisi Berlində yerləşən Meydan TV internet resursu ilə əməkdaşlıq edən bir qrup jurnalistə qarşı cinayət işi ilə əlaqədar ölkədən çıxış qadağası tətbiq edilib. Bu illər ərzində 10-dan çox jurnalist vaxtaşırı Baş Prokurorluğa dindirməyə çağırılıb, burada onlardan Meydan TV-nin maliyyələşmə mənbəyini açıqlamaları tələb olunub.