Rusiyanın “Şeremetyevo” Hava Limanında baş verən təyyarə qəzası nəticəsində ölənlərin sayı 41-ə çatıb.
İnterfaks yazır ki, qəzada həlak olmuş Murmansk sakinlərinin ailələrinə 1 milyon rubl (26 min AZN) ödəniləcək. Bu barədə jurnalistlərə açıqlamasında Murmansk vilayətinin qubernatoru Andrey Çibis bildirib.
Nə baş verib: Dünən Rusiyanın Moskva şəhərindən Murmansk vilayətinə gedən “Aeroflot” aviaşirkətinə məxsus “Sukhoi Superjet 100” (SSJ-100) sərnişin təyyarəsi havada ikən yanmağa başlayıb və “Şeremetyevo” Hava Limanına qəza enişi edib. Hava limanına eniş etmədən öncə təyyarənin 45 dəqiqə ərzində Moskva ətrafında fırlandığı deyilir. Hadisə zamanı göyərtədə 78 nəfər olub.
Yanğına nəyin səbəb olduğu ilə bağlı rəsmi qurumlar açıqlama verməyib. Ancaq Aeroflot firması hadisənin təyyarənin motorunun alovlanması nəticəsində baş verdiyini bildirib.
Faktla bağlı istintaq başlayıb.
