2016-ci ilin iyul ayında fəaliyyəti dayandırılan ANS Yayım və Media şirkətinin prezidenti Vahid Mustafayev Baş Prokurorluqdan bəraət aldıqları barədə məktub alıb.
Bu barədə onun özü məlumat yayıb.
Məlumata görə, 2016-ci ilin iyul ayında qardaş Türkiyədə dövlət çevrilişinə cəhdlə bağlı Azərbaycanda aparılan təhqiqatlarda ANS Yayım və Media Şirkətinin təqsirinin olmadığı sübuta yetirilib.
Nə baş verib: ANS televiziyası Rabitə və İnformasiya Texnologiyaları Nazirliyinin qərarı ilə 2016-cı il, iyulun 18-də fəaliyyətini dayandırıb. Telekanalın yayımının dayandırılmasına səbəb ABŞ-da olan dini lider Fətullah Gülənin Türkiyə hökuməti əleyhinə olan müsahibəsinin yayımının qarşısını almaq olub.
ANS ilə bağlı məlumat yayan Milli Televiziya və Radio Şurası (MTRŞ) deyib:
ANS Müstəqil Yayım və Media Şirkəti Azərbaycan və Türkiyə xalqları arasında qardaşlıq və strateji tərəfdaşlıq münasibətlərinin ruhuna zidd mövqe tutub, Türkiyə dövlətinin və hakimiyyətinin əleyhinə təbliğat aparıb, bu ölkədə terrorçu təşkilat kimi tanınan, çoxsaylı insan ölümünə səbəb olmuş qanlı hadisələri təşkil edən Fətullah Gülənə və onun tərəfdarlarına dəstək verib
Məhkəmə qərarı ilə telekanalın lisenziyası ləğv olunub.
