Myanmada Dövlət Sirrləri Haqda Qanunu pozmaq ittihamı ilə Reuters informasiya agentliyinin 7 il həbsə məhkum edilən 2 müxbiri – Va Lon və Kyau So bu gün azadlığa çıxıb.
BBC yazır ki, onlar ölkə lideri Vin Myinin aprelin 17-də ənənəvi yeni il şənlikləri səbəbilə imzaladığı kütləvi amnistiya çərçivəsində sərbəst buraxılıblar. Əfv qərarı ilə 500 gündür həbsdə olan Va Lon və Kyau So ilə yanaşı 6520 dustaq da sərbəst buraxılıb.
Reuters-in baş redaktoru deyib ki, müxbirlər Myanmardan hazırladıqları reportajlara görə ötən ay Pulitzer mükafatı qazanıblar və onlar artıq azad medianın simvolu hesab olunurlar.
Nə baş verib: Va Lon və Kyau So Myanmada Rohinca böhranı və Arakan müsəlmanlarının öldürülməsi ilə bağlı hərbi sənədləri üzə çıxarıblar. Məlum olub ki, Inn Din kəndində ordu rohincalı 10 kişini qətl edib.
2017-ci il, dekabrın 13-də jurnalistlər saxlanılıblar. 1 il həbsdə qalan jurnalistlər barədə ötən ilin sentyabr ayında hökm çıxarılıb. Onların hər birinə 7 il həbs cəzası verilib.
