İran nüvə proqramı ilə bağlı Əhatəli Razılaşma Müqaviləsində üzərinə götürdüyü öhdəliklərin bir qisminin icrasını dayandırıb.
Anadolu Agentliyi yazır ki, bunu İran Prezidenti Həsən Ruhani Nazirlər Kabinetinin bu gün keçirilən toplantısında elan edib.
İranın müqavilədə nəzərdə tutulmuş maraqları təmin edilməsə, 60 gün ərzində zənginləşdirilmiş uranın səviyyəsini artıracağıq
, – deyə H.Ruhani vurğulayıb.
O, bildirib ki, İranın nüvə proqramı ilə bağlı danışıqlara vasitəçilik edən “altılıq” (ABŞ, Almaniya, Britaniya, Fransa, Rusiya və Çin) ölkələrindən ABŞ istisna olmaqla beşinə məsələ ilə bağlı məktub göndərilib.
Moskvada rəsmi səfərdə olan İran Xarici İşlər naziri Məhəmməd Cavad Zərif isə ölkəsinin dövlət televiziyasına verdiyi açıqlamada ABŞ-ın müqavilədən ayrılmasının üzərindən 1 il keçməsinə baxmayaraq İranın maraqlarını qoruyacaq addımların atılmadığını vurğulayıb:
İran nüvə müqaviləsindəki öhdəliklərinin bir qisminin icrasını dayandırır. Nüvə müqaviləsinin 26-cı və 36-cı maddələri İrana bu haqqı verir. Yəni biz müqaviləyə zidd heç nə etmirik
Nə baş verib: Bəhs edilən müqavilə 2015-ci il iyulun 15-də imzalanıb. 2018-ci il mayın 8-də Donald Trampın imzaladığı qərarla ABŞ İranın nüvə proqramı üzrə müqavilədən çıxıb. Ötən il yanvarın 9-da rəsmi Tehran bəyan edib ki, ABŞ həmin müqavilədən çıxarsa, İran da razılaşma ilə bağlı öhdəlikəri yerinə yetirməkdən imtina edəcək.
