Şənbə günü Əfqanıstanın paytaxtı Kabildə qadın jurnalist Mena Manqal öldürülüb. Daxili İşlər Nazirliyinin yaydığı məlumata görə, hadisə səhər saat 8 radələrində Manqalın taksi gözlədiyi vaxt baş verib.
Şahidlərin Azadlıq Radiosuna dediyinə görə, jurnalistə 2 motosikletdən atəş açılıb. Şahidlərdən birinin sözlərinə görə, motosikletdəkilərdən biri insanlar qaçsın və ərazidən uzaqlaşsınlar deyə havaya atəş açıb, sonra isə iki dəfə jurnalistin sinəsinə atəş açıb.
Mena Manqal kimdir: Jurnalist 10 ilə yaxın müxtəlif telekanallarda – Ariana TV, Lamar və Shamshad TV-də aparıcılıq edib. Onun sosial şəbəkələrdəki hesablarında mütəmadi olaraq qadın haqqlarının vəziyyəti, iş və təhsil hüquqları barədə müzakirələr aparılıb. M.Manqal həmçinin Əfqanıstan parlamentində mədəniyyət sahəsi üzrə məsləhətçi kimi çalışırdı.
Jurnalist təhdid olunub: Bir müddət əvvəl Manqal sosial şəbəkədə yazıb ki, 2017-ci ildə o, məcburən ərə verilib. Son zamanlarda isə jurnalist öldürüləcəyi ilə bağlı təhdid mesajları aldığını deyirdi. Qohumlarının ehtimalına görə, jurnalistin qətlində onun keçmiş ərinin əli ola bilər. Polis isə bütün mümkün versiyaları araşdırır.
