Nardaran hadisələri zamanı həbs olunan Abbas Hüseynovun səhhətində ciddi problemlər var.
Onun bacısı Sevinc Hüseynova Meydan TV-yə deyib ki, buna səbəb Abbasa verilən işgəncələrdir:
Axırıncı dəfə Qobustan həbsxanasından aparılanda həbsxananın rəisi Aftandil Ağayev şəxsən özü ona işgəncə vermişdi. Onu qısa müddətə Kürdəxanı təcridxanasına köçürmüşdülər, oradan da Penitensiar Xidmətin Müalicə Müəssisəsinə apardılar. Qobustandakı İşgəncələrə görə ayağı şişib qaralmışdı, su gəlmişdi. Ona görə ayağını əməliyyat eləmişdilər
Qardaşının Müalicə Müəssisəsindən 8 saylı cəzaçəkmə müəssisəsinə köçürüldüyünü deyən S.Hüseynovanın sözlərinə görə, o, yenə də ayağındakı problemlərə görə əziyyət çəkir və təcili müalicə olunmalıdır. Ancaq saxlandığı müəssisədə bu sahə üzrə həkim yoxdur, Müalicə Müəssisəsinə isə köçürülmür:
Yenə ayağı şişib, qızdırma və ağrı verir. Oradakı həkim baxıb, deyib ki, köçürülməlidir. Köçürmürlər, ağrıdan əziyyət çəkə-çəkə qalıb
Nə baş verib: A.Hüseynov 2015-ci il noyabrın 26-da Nardaranda 6 nəfərin ölümü ilə nəticələnən əməliyyat zamanı T.Bağırzadə və digərləri ilə birlikdə həbs olunub. Onlara qarşı qəsdən adam öldürmə, terrora çağırış, dövlət çevrilişinə cəhd də daxil olmaqla, 20-dən çox ağır maddə ilə ittiham irəli sürülüb. T.Bağırzadə və A.Hüseynov 20 il azadlıqdan məhrum edilib.
