Tayvan eynicinslilərin ailə qurmasına icazə verən ilk Asiya ölkəsi olub.
BBC yazır ki, bu gün Tayvan parlamenti eynicinslilərin evliliyini leqallaşdıran qanun qəbul edib.
Millət vəkilləri eynicinslilərin evliliyini qanuniləşdirmək barədə 3 müxtəlif qanun layihəsini müzakirəyə çıxarıblar. Mühafizəkar millət vəkillərinin təqdim etdiyi qanun layihələrində “nikah” sözü əvəzinə “eyni cinsli ailə münasibətləri” və ya “eyni cinslilərin ittifaqları” ifadələrindən istifadə edilib. Ancaq Demokratik Mütərəqqi Partiyadan olan millət vəkillərinin səs çoxluğu ilə (27 səsə qarşı 66 səs) eynicinsli ailələrə övladlığa uşaq götürmək haqqı da verən ən mütərəqqi qanun layihəsi qəbul edilib.
Qanun prezident Tsai İnq-ven tərəfindən imzalandıqdan sonra qüvvəyə minəcək.
Nə baş verib: 2017-ci ildə Tayvanın Konstitusiya Məhkəməsi ailə qurumu ilə bağlı hazırda qüvvədə olan qanunların insan haqqlarına zidd olduğu üçün eynicinslilərin evliliyinin leqallaşdırılmasına qərar verib. Qanunda dəyişiklik edilməsi üçün parlamentə 2 il vaxt verilib. Parlament bu ilin mayın 24-nə kimi eynicinslilərin evlilik hüququnu leqallaşdıran qanun çıxarmalı idi.
