ABŞ “WikiLeaks” saytının təsisçisi Culian Assanca qarşı daha 17 maddə üzrə ittiham irəli sürüb.
ABŞ-ın Ədliyyə Nazirliyinin yaydığı məlumata görə, Assanc casusluq haqqında qanunu pozmaqda ittiham edilir.
BBC yazır ki, Asanc ABŞ ordusunun keçmiş kəşfiyyat analitiki Çelsi Menninq ilə birgə gizli məlumatların olduğu minlərlə səhifəlik sənədləri ələ keçirib. “Wikileaks”də yayımlanan həmin sənədlərdə ABŞ ordusuna dəstək olan şəxslərin adları və onlar haqda gizli məlumatlar da yer alıb. Bu məlumatların üzə çıxması həmin şəxslərlə yanaşı, ABŞ-a da zərər vurub.
Ədliyyə nazirinin müavini Con Demers Asancın jurnalist olmadığını iddia edib:
Asanc jurnalist deyil. Heç bir məsuliyyətli jurnalist gizli saxlanılan şəxslərin təhlükə ilə üzləşəcəyini bilə-bilə onların adlarını açıqlamaz
İrəli sürülən yeni ittihamların hər biri 5-10 il həbs cəzası ilə nəticələnə bilər. Bu isə Asancın ümumilikdə 175 il azadlıqdan məhrum edilə biləcəyi mənasına gəlir.
Məhkəmə mayın 30-da davam edəcək.
