"Yaşıllar"ın nəticələri açıqlanır. Foto: AFP

Avropa Parlamentinə (AP) keçirilən seçkilərin ilkin nəticələri açıqlanıb.

Euronews yazır ki, seçkilərdə sağ və sol mərkəzçi partiyalar səs itirib. Ən çox səs toplayan ilk üçlükdəki partiyalardan ikisi tarixdə ilk dəfə səs itiriblər:

  • Avropa Xalq Partiyası (PPE) – 179 mandat (42 mandat itirib)
  • Sosialistlər və Demokratların Tərəqqi İttifaqı (S&D) – 150 mandat (41 yer itirib)
  • Avropa naminə Liberallar və Demokratlar İttifaqı – 108 mandat
  • Yaşıllar Partiyası isə Almaniya və Fransada yaxşı nəticələr əldə edib və 70 mandat qazanıb.

Almaniyadakı nəticələr: Baş nazir Angela Merkeli dəstəkləyən Xristiyan Demokrat Birlik Partiyası (CDU) ilə Xristiyan Sosial Birlik Partiyası (CSU) birgə 28,7 faiz səs toplayıb. İkinci yeri isə 20,7 faiz səslə Yaşıllar tutub.

Fransadakı nəticələr: Milli Birlik ( Rassemblement national) partiyası (ifrat sağ) – 23.53%

Prezident Emmanuel Makronun partiyası – LREM – 22,47%

Böyük Britaniyadakı nəticələr: Bu ölkədə mühafizəkarlar və işçi partiyası səs itirib, Brexit Partiyası qalib olub.

  • “Avropa Birliyində (AB) qalmalıyıq” deyən partiyalar – 40.4%
  • AB-dən saziş imzalamadan çıxmaq tərəfdarı olan partiyalar – 34.9%
  • AB-dən sazişlə ayrılmaq istəyən partiyalar – 23.2%

İşçi Partiyasının lideri Ceremi Korbin deyib ki, seçki nəticələri Brexit referendumunun təkrarlanmasını labüd edir.

İtaliyadakı nəticələr: Bu ölkədə immiqrantların əleyhinə olan ifrat sağçı Lig partiyası qalib olub.

Nə baş verib: 23-26 may tarixlərində AB üzvü olan 28 ölkədə təxminən 400 milyon seçicinin iştirakı ilə AP-nin 751 üzvü müəyyənləşdirilib. Seçkidə seçicilərin 51 faizi iştirak edib. Bu son 20 ilin ən yüksək seçici fəallığı hesab olunub.