İlqar Məmmədov REAL partiyasının ofisində. Foto: realpartiya.org

Avropa İnsan Haqları Məhkəməsinin Böyük Palatası Azərbaycanın Avropa Şurasındakı üzvlük öhdəliyini pozduğu barədə qərar qəbul edib. REAL Partiyasının sədri İlqar Məmmədovun yaydığı məlumata görə, qurum bu barədə qərarı bir neçə dəqiqə öncə dərc edib və qərar dərhal qüvvəyə minib.

Məhkəmənin qərarına səbəb isə REAL Partiyasının sədri İlqar Məmmədovun azadlığa buraxılması ilə bağlı tələbin yerinə yetirilməməsi olub.

Nə baş verib: Avropa İnsan Haqları Məhkəməsinin bu gün elan olunan qərarı aprelin 1-də verilib. Məhkəmə Avropa Şurası Nazirlər Komitəsinin müraciətinə əsasən qərar qəbul edib. Müraciətdə deyilirdi ki, Azərbaycan hakimiyyəti İlqar Məmmədovu azad etməməklə və onun həbsdən öncəki hüquqi vəziyyətini bərpa etməməklə özünün Avropa Şurasındakı üzvlük öhdəliyini pozur.

  • Tarixdə ilk dəfə Şura üzv ölkəyə qarşı məhkəmədə belə iddia qaldırıb.