Foto: Council of Europe / Candice Imbert

Avropa Şurasının Hüquq məsələləri və insan hüquqları Komitəsi maltalı jurnalist Dafna Karuana Qalitsiyanın qətlinin araşdırılması haqqında məruzə dərc edib.

AŞPA-nın yay sessiyasına çıxarılacaq məruzədə bildirilir ki, Maltada əsas korrupsiya obyekti 33 yaşlı İranlı Əli Sədr Haşeminecad tərəfindən təsis edilmiş özəl Pilatus Bankı olub.

Əli Sədr Haşeminecad kimdir: O, gənc və təcrübəsiz olmağına baxmayaraq 2013-cü ilin oktyabrında bank lisenziyası alıb. 2018-ci ilin sentyabrında isə Avropa Bank İdarəsi ona məxsus Pilatus Bankın lisenziyasında pozuntular aşkar edib.

Bankın bir çox müştərilərinin “siyasi əhəmiyyətə malik şəxslər” olduğu müəyyən edilib, bu da pulların yuyulması şübhəsini artırıb. Onlar arasında Azərbaycan prezidentinin qızlarına və Azərbaycan nazirlərindən birinə məxsus şirkətlər də var idi.

2018-ci ilin martında Haşeminecad ABŞ-da həbs edilib və İrana qarşı sanksiyaları pozmaqda ittiham olunub. Bankın aktivləri dondurulub, lisenziya isə 2018-ci ilin noyabrında geri alınıb.

Məruzədə nə deyilir: Korrupsionerləri təqib etmək üçün siyasi iradə və ya imkanın olmadığı ölkələrdə onları ifşa edən jurnalistlər çox vaxt özləri təqib hədəfinə çevrilirlər. Dövlətin bütün gücü korrupsionerlərə deyil, jurnalistlərə və korrupsiyanı ifşa edənlərə qarşı yönəlir. Jurnalistlər Panama sənədlərini – bütün dünya üzrə dövlət xadimləri və siyasətçilər arasında geniş korrupsiya şəbəkəsini ifşa edən sənədləri üzə çıxardıqda da məhz bu baş verdi. D. K.Qalitsiyanın ölümü tamamilə araşdırılana qədər Avropa Şurası bu işi nəzarəti altında saxlamalıdır.

Nə baş verib: D.K.Qalitsiya ölkəsində və xaricdə siyasətçilərin və dövlət məmurlarının korrupsiya faktlarını araşdırıb. O, 2017-ci il oktyabrın 16-da avtomobilinə qoyulmuş bomba ilə öldürülüb.