AXCP Nərimanov rayon təşkilatının sədri Babək Həsənov mayın 28-dən etibarən 6 saylı cəzaçəkmə müəssisəsində müddətsiz aclıq aksiyasasına başlayıb.
Bu barədə AXCP sədrinin müavini Gözəl Bayramlı məlumat yayıb:
Daha öncə Babək Həsənova qarşı təzyiqlər edilib. Məsələ ictimailəşdirildikdən sonra təzyiqlər dayandırılıb. Babək Həsənovla həbsxanada ünsiyyətdə olan insanlara qarşı təzyiqlər isə davam etdirilir. Hətta onunla 5 dəqiqə ərzində ünsiyyətdə olan Müsəlman Birliyi Hərəkatının üzvü Əhsən Nuruzadə cərimə təcridxanasına salınıb. Babək Həsənov onunla ünsiyyət quran şəxslərə qarşı təzyiqlərin dayandırılması tələbi ilə aclıq edir
Turan yazır ki, Penitensiar Xidmətin ictimaiyyətlə əlaqələr şöbəsi Babək Həsənovun aclıq etməsi ilə bağlı yayılan məlumatlar əsassız olduğunu deyib:
Babək Həsənov aclıq etmir. Onun saxlanıldığı müəssisə açıq tiplidir və orada məhbusların ünsiyyət qurmasına məhdudiyyət qoymaq mümkün deyil. Bu barədə yayılan məlumatlar da doğru deyil. Əhsən Nuruzadənin cərimə kamerasına salınması isə onun daxili intizam qaydalarını pozması ilə bağlıdır və bunun Babək Həsənova aidiyyatı yoxdur
Nə baş verib: Babək Həsənov 2018-ci il mayın 25-də digər AXCP fəalları Aqil Məhərrəmov və Ruslan Nəsirovla eyni vaxtda saxlanılıb. Gədəbəy Rayon İcra Hakimiyyətinin keçmiş başçısı Saleh Rüstəmovla birlikdə çirkli pul vəsaitlərini leqallaşdırmaqda ittiham olunan fəallara bu il fevralın 27-də hökm oxunub. Bakı Ağır Cinayətlər Məhkəməsi Saleh Rüstəmovu 7 il 3 ay, Aqil Məhərrəmovu 4 il, Babək Həsənovu 3 il həbsə məhkum edib.
