Amerika Birləşmiş Ştatları prezidenti Donald Tramp və həyat yoldaşı Melania Tramp Böyük Britaniyada səfərdədir.
CNN səfər çərçivəsində kral ailəsinə hansı hədiyyələrin və onların necə verildiyini yazıb.
Hədiyyə seçmək prosesinə Dövlət Departamenti də cəlb olunur. Bu zaman bütün detallara fikir vermək və yüksək səviyyəli protokollara riayət etmək əsasdır. Ən yaxşı hədiyyəni tapmaq mürəkkəb məsələdir – hədiyyə şəxsi olmalı, həm də onun iki ölkə arasında və ya hədiyyəni verənlə, qəbul edən arasında bir növ tarixi ölçü rolu oynayacağı unudulmamalıdır.
Ağ Evin yaydığı məlumata görə, Tramp kraliçaya Tiffany & Co. brendindən ipəkdən hazırlanan və lalə ilə bəzənən gümüş sancaq hədiyyə edib. Sancaq qırmızı dəri ilə örtülmüş, Ağ Evə məxsus taxta lal-cəvahirat qutusunda təqdim olunub.
Kraliçanın həyat yoldaşı, şahzadə Filipə isə fərdi “Air Force One” pencəyi hədiyyə edilib. Şahzadənin digər hədiyyəsi isə məşhur amerikalı general, İkinci Dünya Müharibəsində hava qüvvələrinin komandiri olan Ceyms Dulittlın özünün imzaladığı “Bir də heç vaxt bu qədər şanslı ola bilmərəm” (I Could Never Be So Lucky Again) adlı avtobioqrafik kitabdır.
Şahzadə Filip kraliça ilə ailə qurana qədər Hava Qüvvələri marşalı da daxil olmaqla, bir sıra hərbi rütbələrə yiyələnib.
Kraliça isə Donald Trampa Uinston Çörçilin 1959-cu ildə nəşr olunmuş “İkinci Dünya müharibəsi” (The Second World War) kitabının qırmızımtıl keçi dərisi ilə cildlənmiş və qızılla bəzədilmiş nəşrini hədiyyə edib. Hədiyyəni 3 hissədən ibarət “Duofold” qələm dəsti tamamlayıb.
Bu hədiyyənin seçilməyinin səbəbi Trampın Çörçilə xüsusi hörmətinin olmağıdır. Prezident seçiləndən sonra onun ilk əmrlərindən biri Barak Obamanın dövründə “Oval Ofis”dən götürülən Çörçil büstünün yerinə qaytarılması barədə olub.
Kraliça birinci xanıma isə əl işi olan xüsusi gümüş qutu hədiyyə edib.
