Sudanda etirazçılara müdaxilə edilir. Foto: Reuters

Sudan ordusu bir neçə həftədir paytaxt Xartumda oturaq aksiya keçirərək mülki idarəetməyə keçməyi tələb edən etirazçılara müdaxilə edib.

Euronews yazır ki, hərbi müdaxilə zamanı ən azı 35 nəfər ölüb, onlarla insan xəsarət alıb. Ölü və yaralı sayının artacağı istisna edilmir.

Sudan ordusu etirazlara rəhbərlik edən Azadlıq və Dəyişiklik Bəyannaməsi Qüvvələri ilə müzakirələrə son verildiyini və keçid hökuməti ilə bağlı əldə olunan razılığın ləğv olunduğunu bəyan edib.

General Əbdül Fəttah əl-Bürhan seçkilərin ən geci 9 ay ərzində keçiriləcəyini açıqlayıb.

Nə baş verib: Sudanda iqtisadi böhrana görə 2018-ci ilin 19 dekabrında başlayan etiraz aksiyaları qısa zamanda rejim əleyhinə üsyanlara çevrilib. Ordu bu ilin 11 aprelində 30 ildir ölkəni idarə edən Ömər əl-Bəşiri devirərək hakimiyyəti ələ keçirib. Mülki idarəetmə tələb edən xalq isə etirazalara davam edib. Keçid hökümətinin necə qurulacağı ilə bağlı ordu rəhbərliyi ilə etirazçılar arasında müzakirələr aparılıb. Amma proses uzandığından xalq ordunu mülki idarəetməyə keçməmək üçün bəhanə axtarmaqda və vaxt öldürməkdə ittiham edir.