“Wikileaks”in yaradıcısı Culian Assancın Belmarş həbsxanasında çəkilmiş fotoları yayılıb.
Fotoları həbsxanadakı məhkumlardan biri qeyri-qanuni yolla əldə etdiyi mobil telefonla çəkib. İlk olaraq “Gateway Pundit” saytının yayımladığı fotolarda Assancın saçları yenə qısadır və çəkisi azalıb.
Saytda qeyd olunur ki, fotolar Assancın səhhəti pisləşmədən əvvəl çəkilib. Məhkumların onu sevdiyi və hörmət etdiyi də bildirilir.
Şəkilləri çəkən məhkum “Gateway Pundit” saytına deyib ki, bu fotolara görə ona yerli qəzetlərin birindən külli miqdarda pul təklif olunsa da qəbul etməyib. Məhkumun sözlərinə görə, onun məqsədi pul qazanmaq yox, Assancın vəziyyəti barədə insanları məlumatlandırmaqdır.
Assanc hazırda müalicə müəssisəsindədir və gün ərzində ona 500-dən çox məktub gəldiyi deyilir.
NOS telekanalının yaydığı məlumata görə, hazırda ABŞ Ədliyyə Nazirliyi Culian Assanca qarşı yeni ittihamlar hazırlayır. Bildirilib ki, əvvəllər Assancın ən yaxın adamlarından biri olan, daha sonra Federal Təhlükəsizlik Bürosu (FTB) ilə əməkdaşlıq edən Siqurdur Tordarson əsas şahid qismində prosesə cəlb edilib.
Nə baş verib: Ötən həftə 47 yaşlı Assancın səhhəti pisləşib və o, həbsxananın müalicə müəssisəsinə köçürülüb. Vəkilləri onun əqli vəziyyətinin də yaxşı olmadığını bildiriblər. Səhhətinə görə Assanc mayın 31-ində baş tutan məhkəmə iclasında iştirak edə bilməyib. Məhkəmə dinləməsi iyunun 14-nə təxirə salınıb.
