Nəsrin Sotudə. Foto: Getty images

Dünyanın 200-dən artıq ölkəsindən 1 milyondan çox insan petisiya imzalayaraq İran hakimiyyətini tanınmış insan hüquqları müdafiəçisi Nəsrin Sotudəni azadlığa buraxmağa çağırıb.

Bu barədə məlumatı Amnesty International hüquq-müdafiə təşkilatı yayıb.

Amnesty imzaları İranın müxtəlif ölkələrdəki səfirliklərinə bu gün təqdim etdiyini bildirib.

Qurumun Yaxın Şərq və Şimali Afrika üzrə araşdırma və təbliğat direktoru Filip Luther deyir ki, imza kampaniyası N.Sotudə azadlığa buraxılanadək davam etdiriləcək.

Nə baş verib: Avropa Parlamentinin 2012-ci il Düşüncə Azadlığı üzrə Sakharov Mükafatının qaliblərindən olan Sotudə ötən il iyunun 13-də Tehrandakı evində həbs olunub. Qadın hüquqlarının müdafiəçisi olan N.Sotudə bu ilin mart ayında 33 il yarım həbs və 148 şallaq cəzasına məhkum edilib. O, 2016-cı ilin sentyabrında başqa bir iş üzrə beş illik həbsə məhkum olunub. Beləliklə, onun ümumi həbs cəzası 38 il yarımdır.

N.Sotudə ötən il ölkədə sərt geyim kodeksinə etiraz olaraq baş örtüyünü çıxarmış bir neçə qadını məhkəmələrdə təmsil edib. İdarəetmənin açıq tənqidçisi olan N.Sotudə daha öncə də üç il həbs cəzası çəkib.

Şərhini yaz

Şərhinizi yazın
Adınızı daxil edin