Həyat və yaradıcılığı ilə 20-ci əsrin ən çox tanınan simalarından birinə çevrilən meksikalı rəssam Frida Kahlonun səs yazısının tapıldığı ehtimal olunur.
Guardian yazır ki, səs yazısı Meksikanın Milli Səs Arxivində tapılıb.
Meksikanın Mədəniyyət naziri Alehandra Frausto səs yazısının Fridaya aid olduğundan 100 faiz əmin olmadıqlarını, mütəxəssislərin hələ də bu məsələni araşdırdıqlarını deyir.
Arxivin direktoru Pavel Qranados isə bu xəbərin bütün mədəniyyət aləmini həyəcanladırdığını bildirib:
Fridanın səsi indiyə kimi sirr olaraq qalıb və sonu gəlməyən axtarışlara səbəb olub
Səs yazısının Fridanın ölümündən 1 il sonra, 1955-ci ildə yayımlanan “El Bachiller” adlı radio verilişinin pilot layihəsindən götürüldüyü ehtimal edilir. Verilişdə Frida həyat yoldaşı üçün yazdığı “Dieqonun portreti” adlı essesindən bir hissəni oxuyub.
Səs yazısını ingilis dilinə Frans Press Agentliyi çevirib.
Frida Kahlo olduğu təxmin edilən qadın səs yazısında bunları deyir:
(Dieqo) mehriban üzü, qəmli baxışları olan div, böyük bir uşaq idi. Tünd, qara və həddən artıq ağıllı, böyük gözləri nadir hallarda yerində dayanırdı. Göz bəbəkləri və göz qapaqları bir qurbağanınkı kimi qabarıq idi və sanki gözləri yuvalarından çölə çıxırdı. Gözləri daha böyük bir vizual sahəni qavraya bilməsinə kömək edirdi, sanki böyük məkanların və izdihamların rəssamı üçün yaradılmışdılar…
