Boris Conson. Foto: Getty images

Böyük Britaniyada Mühafizəkar Partiyanın yeni lideri və eyni zamanda da ölkənin baş naziri olmağa namizədlər üçün ilk səsvermə baş tutub.

Euronews yazır ki, səsvermədə partiyanın 313 deputatı iştirak edib. 114 səslə Boris Conson ən çox səs toplayan namizəd olub. Onun ardınca 43 səslə Ceremi Hant və 37 səslə Maykl Qouv gəlir.

Qaydalara görə, namizədlər növbəti səsvermədə iştirak edə bilmək üçün ən az 17 səs əldə etməli idilər. Bu səbəblə 17-dən daha az səs toplayan Andrea Ledsom, Ester Makvi və Mark Harper baş nazir olmaq şansını itirib.

B.Conson səsvermədən sonra “Twitter” hesabında qələbəsini bu sözlərlə elan edib:

İlk səsvermədən qalib ayrıldığım üçün xoşbəxtəm. Ancaq qarşıda uzun bir yol var

Səsvermədə ikinci olan Ceremi Hant isə nəticədən narazı olduğunu yazıb:

Ölkənin gələcəyi üçün risk heç vaxt bu qədər yüksək olmayıb. Hazırda keçdiyimiz bu ciddi proses, ciddi bir liderə ehtiyac duyur

Boris Conson kimdir: Ən güclü namizədlərdən biri hesab edilən 54 yaşlı Boris Conson 2008-2016-cı illərdə London meri, 2016-2018-ci illərdə isə xarici işlər naziri kimi fəaliyyət göstərib.

B.Consonu ölkənin Avropa Birliyindən (AB) sazişsiz belə olsa, mütləq ayrılmasını istəyənlər dəstəkləyir. O, AB-dən ayrılmaq üçün 40 milyard funt sterlinq məbləğində ödənişi etməməyi, orta təhsil büdcəsini və polis sayını artırmağı vəd edir.

B.Conson 2016-cı ildə o vaxtkı baş nazir Devid Kameronun istefa verməsindən sonra da liderlik üçün namizəd olub, amma son anda bu fikirdən daşınıb.

Baş nazir necə seçiləcək: 13 iyunda İcmalar Palatasında namizədlər üçün səsvermə baş tutub. Ən az 17 səs toplaya bilənlər növbəti səsvermədə iştirak etməyə haqq qazanıb. Növbəti səsvermə isə 17 iyunda keçiriləcək. Bu dəfə namizədlər ən az 33 səs toplamalı olacaqlar. Namizədlərdən 2-si səs çoxluğu əldə edə bilməsə, 19-20 iyunda sonuncu səsvermə keçiriləcək.

Namizədlərin sayı 2-yə düşdükdən sonra 125 min partiya üzvü poçt vasitəsilə səsvermədə iştirak edəcək. Səsvermə 22 iyuna qədər davam edəcək. Nəticə isə iyulun 23-ü açıqlanacaq.