Böyük Britaniyada zərərli gender stereotiplərinin təsvir olunduğu reklamların çəkilməsi qadağan edilib.
BBC yazır ki, bu barədə qərarı ölkədə reklam sektorunu tənzimləyən Reklam Standartları İdarəsi (Advertising Standards Authority) (ASA) verib.
ASA deyir ki, araşdırma nəticəsində sübutlar əldə edilib ki, bəzi stereotiplər uşaqların, gənclərin və yetkinlərin seçimlərini, istəklərini və imkanlarını məhdudlaşdıra bilər və belə reklam gender bərabərsizliyində rol oynayır .
Yeni qayda hansı reklamlara tətbiq ediləcək?
- Bir kişi və ya qadının məhz mənsub olduğu cinsiyyətə görə hansısa vəzifədə uğur qazana bilmədiyini göstərən reklamlar.
- Bir atanın uşağın bezini dəyişdirə bilmədiyini və ya qadının avtomobili düzgün park edə bilmədiyini əks etdirən reklamlar.
- Yaxşı görünməyin və ya evi səliqəli saxlamağın xoşbəxtlikdən daha vacib olduğunu təsvir edən, yəni anaları hədəf alan reklamlar.
- Qəlibləşmiş qadın rollarını icra etdiyi üçün kişiləri aşağılayan reklamlar.
Yeni qaydalar bütün gender stereotiplərinin istifadəsinə yox, ancaq zərərli hesab edilənlərə tətbiq olunacaq. Məsələn, reklamlarda qadınlar yenə alış-veriş edərkən göstərilə biləcək.
ASA yeni reklam qaydalarını ötən ilin dekabrında müəyyən edib, reklamçılara bu qaydalara uyğunlaşmaları üçün 6 ay vaxt verilib.
