Honq Konq lideri Kerri Lam günlərdir etiraz aksiyalarına səbəb olan qanun layihəsinə görə xalqdan üzr istəyib.
Sputnik yazır ki, K.Lam qanun layihəsinin təxirə salındığını və xalq buna hazır olana qədər bir daha gündəmə gətirilməyəcəyini deyib.
Mən məsuliyyətin böyük hissəsini şəxsən öz üzərimə götürürəm. Bu qanun layihəsi cəmiyyətdə ziddiyyətlərə, mübahisələrə və narahatlığa səbəb oldu. Buna görə Honq Konq xalqından səmimi qəlbdən üzr istəyirəm
Buna baxmayaraq Honq Konq liderinin bu açıqlaması etirazçıları razı salmayıb. Onlar K.Lamın istefa verməyini, ya da qanun layihəsininin tamamilə ləğvini tələb edirlər.
Nə baş verib: Bir neçə gündür Honq Konqda cinayət və təcavüzdə ittiham olunaraq Honq Konqda saxlanılan şübhəlilərin Çin, Tayvan və Makaoya ekstradisiya olunmasına imkan verən yeni qanun layihəsi əleyhinə etiraz aksiyaları keçirilir. Layihədə siyasi və ya dini əsaslarla saxlanılanların ekstradisiyasının nəzərdə tutulmadığı iddia olunur.
Xalqın “Şeytan layihəsi” adlandırdığı qanuna etiraz olaraq 1 milyon insanın küçələrə çıxdığı bildirilib. 12 iyunda etirazçılar parlament binasına doğru yürüş edib, şəhərin mərkəzi küçələrindən biri olan “Lung Wo” küçəsini nəqliyyata bağlayıblar. Yüzlərlə polis aksiya iştirakçılarına bibər qazı ilə müdaxilə edib və onların ən qısa vaxtda küçələri boşaltmaları tələb olunub.
