Donald Tramp Orlanda şəhərində tərəfdarları qarşısında çıxış edib. Foto: BBC

ABŞ prezidenti Donald Tramp 2020-ci ildə keçiriləcək prezident seçkilərində yenidən namizəd olacaq.

Anadolu Agentliyi yazır ki, Tramp seçki kampaniyasına Florida ştatının Orlando şəhərində start verib.

O, tərəfdarları qarşısında çıxışında indiyə qədər gördüyü işlərdən danışıb və onlardan səs istəyib:

ABŞ prezidenti kimi ikinci müddətə seçki kampaniyama rəsmi şəkildə başlamaq üçün qarşınıza gəlmişəm. Söz verirəm ki, sizi heç vaxt pis vəziyyətdə qoymayacağam

Demokrat rəqibləri haqqında danışan prezident deyib ki, 2020-ci ildə demokratlara veriləcək hər səs radikal sosializmin yüksəlməsinə və “Amerika xülyası”nın (American dream) məhv olmasına gətirib çıxaracaq. Tramp demokratların ölkəni məhv etməyə çalışdığını və onun buna imkan verməyəcəyini bildirib.

Seçkilər 2020-ci il noyabrın 3-də baş tutacaq. Bu, ABŞ tarixində 59-cu prezident seçkisi olacaq.