Elina Hacıyevanın qəbrində dağıntı olub, cinayət işi açılıb

162 nömrəli orta məktəbin intihar edən 8-ci sinif şagirdi Elina Hacıyeva ilə bağlı yeni cinayət işi başlanıb.
Azadlıq radiosu yazır ki, vəkil Emin İsayev E.Hacıyevanın qəbrinə müdaxilə ilə bağlı narahatlıq olduğunu deyib:

“Qəbri valideynləri ziyarət edən zaman bəzi hallar müəyyən olunub. Qəbrin üstündə dağıntı әlamәtlәri var idi. Bununla bağlı dərhal polisə məlumat verilib. Faktla bağlı Cinayət Məcəlləsinin 245-ci (qəbir üzərində təhqiredici hәrәkәt) maddəsi ilə cinayət işi başlanıb”.

Vəkilin sözlərinə görə, həmin maddə üzrə ittiham edilən şəxsi 2 ilədək islah işləri və ya 5 ilədək həbs cəzası gözləyir.

Nə baş verib: Bakıda 162 saylı məktəbdə oxuyan E.Hacıyeva aprelin 4-də özünü üçüncü mərtəbədən atıb və aprelin 6-da xəstəxanada vəfat edib. Hadisə ilə bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb. Şagirdin intiharına səbəb kimi məktəbdə ona pis münasibət olduğu qeyd edilir. Məktəbin direktoru Sevinc Abbasova, direktor müavini Lalə Məhərrəmova, sinif rəhbəri Çimnaz Mehdiyeva və həmin təhsil müəssisəsinin psixoloqu Könül Ağayeva işdən çıxarılıb.
Direktor S. Abbasova Cinayət Məcəlləsinin 143 və 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddələri ilə təqsirləndirilib və məhkəmənin qərarı ilə barəsində ev dustaqlığı qətimkan tədbiri seçilib.