İranın İslam İnqilabı Keşikçiləri Korpusu (İİKK) Amerika Birləşmiş Ştatlarına (ABŞ) məxsus pilotsuz uçuş aparatının (PUA) vurulduğu barədə bəyanat yayıb.
Sputnik yazır ki, bəyanatda Amerikanın İranın hava sərhədlərini pozan “Global Hawk” pilotsuz aparatının İİKK hərbi-hava qüvvələri tərəfindən Hormozqan əyalətinin Kuxe Mübarək rayonu üzərində vurulduğu bildirilib.
“Associated Press”ə açıqlama verən ABŞ-ın Mərkəzi Qüvvələr Komandanlığının (CENTCOM) mətbuat katibi Bill Urban xəbəri təkzib edib. O, İranın hava məkanına ABŞ-a məxsus heç bir pilotsuz uçuş aparatının daxil olmadığını deyib.
Digər ABŞ rəsmisi isə PUA-nın vurulduğunu təsdiqləyib, amma onun İranın hava məkanında yox, beynəlxalq hava sahəsində vurulduğunu deyib.
Nə baş verib: Ötən həftə Oman körfəzində iki neft tankerinin hücuma məruz qalmasından sonra ABŞ ilə İran arasında münasibətlər daha da gərginləşib. ABŞ hücumu İranın həyata keçirdiyini iddia edir, İran tərəfi isə bu ittihamları qəbul etmir.
