Foto: Reuters / Çarlz Platio

Məşhur hollandiyalı rəssam Vinsent Van Qoqun intihar etmək üçün istifadə etdiyi revolver 162 min 500 avroya satılıb.

Euronews yazır ki, “Lefaucheux” brendinə məxsus revolver Paris şəhərində hərraca çıxarılıb. “AuctionArt” hərrac evinin yaydığı məlumata görə adı açıqlanmayan kolleksiyaçı silahı gözləniləndən 3 dəfə baha qiymətə alıb.

Van Qoqun 1890-cı ildə məhz bu silahla özünə qəsd etdiyi ehtimal olunur. “Sənət tarixinin ən məşhur silahı” hesab edilən revolver 1965-ci ildə məşhur rəssamın həyatının son bir neçə ayını keçirdiyi Over-sür-Uaz qəsrinin arxasındakı tarlada fermerlərdən biri tərəfindən tapılıb. Revolver uzun illər Amsterdamdaki Van Qoq muzeyində saxlanılıb.

Bir çox sənət tarixçisi Van Qoqun intihar etdiyi mövzusunda həmfikir olsa da, son illərdə rəssamın tarlada silahla oynayan uşaqların ehtiyatsızlığının qurbanı olduğu ilə bağlı iddialar da ortaya çıxıb. Hətta “Əbədiyyətin qapısında” (At Eternity’s Gate) adlı bioqrafik filmdə rəssamın səhvən vurulduğu iddiasına üstünlük verilib.

Şərhini yaz

Şərhinizi yazın
Adınızı daxil edin